Қысқа дайындық

Өткен аптада аудандық «Нұр Отан» партиясы филиалының ғимаратында төтенше жағдайлар бөлімінің басшысы Нұрмұхамед Интуевтің басшылығымен «Қысқы маусым уақытындағы қауіпсіздік» тақырыбында дөңгелек үстел өтті.

Аудандық «Нұр Отан» партиясы филиалы төрағасының бірінші орынбасары М.Нұрланов, №45 жолдарды пайдалану бөлімінің басшысы А.Салықов, жергілікті полиция бастығы Б.Кощеғұлов, мәдениет және тілдерді дамыту бөлімі мен орталық аурухана мамандарының қатысуымен өткен дөңгелек үстелде көміртек тотығынан шығатын улы газды сезетін датчиктер орнату жұмыстарын жалғастыру, көктайғақ кезеңінің алдын алуда құм-тұз қоспасын төсеу мәселелері талқыға түсті.

Қар тазалау жұмыстары да назардан тыс қалмады. Қыстың қытымыр мінезінен туындап тұратын аязды-боранды күндерде жолаушы өмірін сақтау мақсатында жасалатын шаралар мен түрлі жағдайларға тап келтірер қыс мезгіліндегі аурухана дайындығы пысықталды.

Тұрғын үй секторларында өрт қауіпсіздігі шараларын сақтау, пештерді орнату кезіндегі қауіпсіздік ережелері мен міндетті талап нормалары көрсетілген жаднамалар таратылды.

Б.Жакешова

Д.Торжановтың суреті

Кері қайту