Музейдегі шара

Аудандық тарихи өлкетану музейінде мүмкіндігі шектеулі балаларға арналып қызықты да, тартымды шара өтті. Балалар музей жәдігерлерімен танысып, қызықты ойындар ойнады.

Аудандық жұмыспен қамту және әлеуметтік бағдарламалар бөлімі қызметкерлерінің көмегімен 3 бала, Сұлтанмахмұт Торайғыров атындағы тірек мектебінен бір оқушы музей қонағы болды.

Музей қызметкерлері Жұпар Жаппарова мен Болат Досанбек балаларға экскурсия жүргізіп, құнды жәдігерлерімен таныстырды. Балалар шаршап, жалығып кетпесі үшін ойындар ойнатылды. Бала логикасын дамытатын, есту, көру қабілетін, қол моторикасын жақсартатын, есептілікке үйрететін ойындар өтті.

Кеселерді жіппен тартып ойнау барысында балаларға жасырын сыйлықтар табысталды. Кештен ерекше әсер алған балалар үйлеріне көңілді тарқасты.

- Музейіміз тұрғындар үшін қолайлы жағдай жасауға дайын. Бізге келген әр тұрғынға музей жәдігерлері таныстырылады. Қызметкерлер барынша ақпарат береді. Бүгінгі күні музейге қоларбамен көтерілуге арналған пандус орнатылды. Біздің есік барша тұрғынға ашық, - дейді Орал Нәбиева.

Б.Жакешова

Д.Торжановтың

суреттері

Кері қайту