Абай - дара, Абай - дана қазақта

Игі шараның оқушыларға берер тәлім мен тәрбиесі, өнеге мен білімі мол болды. Ұлы Абайдың шығармашылық мұрасы - халқымыздың ғасырлар бойы маңызын жоймайтын рухани қазынасы.

Маңызын жоймау былай тұрсын, заман өзгеріп, қоғамдық санада күрт сапырылыстар пайда болған сайын бұл қазына өзінің жаңа бір қырларымен жарқырай ашылып,қадірін арттыра түсетініне Абайдан кейінгі уақыт айқын көз жеткізді.Ақынның дүниеге келгеніне бір жарым ғасыр,ал өзінің мәңгі өлмес шығармаларымен халқына сөздің ұлы мағынасында ұстаздық ете бастағанына ғасырдан астам уақыт өтті.Содан бері оның артына қалдырып кеткен мұрасы елі мен жұртының рухани өміріндегі қай бұрылыстар мен қай құбылыстар тұсында да айнымас темірқазық,адастырмас құбылнама болып қызмет етіп келеді. Бұл күнде Абай сөзі әр қазақтың ағзасына ана сүтімен бірге дариды десе, артық айтылғандық емес. “Ана сүті тән қорегі ретінде жас сәбидің буыны бекіп, бұғанасы қатаюына қызмет етсе, ақын сөзі оның санасына адамдық пен азаматтықтың ұрығын сеуіп қызмет етеді“, - деп Ж.Ысмағұловтың айтқан құнды ойы ұлы ғұламаның 175 жылдығының кең ауқымда мектебімізде аталып өтуінің айқын дәлелі болды.

Ән байқауында оқушылар мен ұстаздар белсене қатысып, ақынның өлмес құнды мұрасының мән-мағынасына терең бойлай білді. Бұл шараға қатысушылар өздерінің жақсы дайындықпен келгендерін дәлелдеп, жиналған жұртшылықтың ризашылықтарына бөленді. Оқушылардың сынып жетекшілерімен қосылып құйқылжыта ән салғаны құлақтан кіріп бойды алардай сезімге бөледі. Абайдың мол мұрасын әрі қарай дәріптеу мақсатында мектебімізде ұстаздар мен оқушылар арасында әр дүйсенбі «шығармалар эстафетасы» өтіп тұрады. Рухани бай, кемеңгер ұрпақ тәрбиелеуде аталған іс- шаралардың өткізілуі мол жемісін береді деген сенімдемін.

А.Баймұрынова,

орыс тілі мен

 әдебиеті пәнінің мұғалімі

Қаражар орта мектебі

Кері қайту